អក្សរសាស្ត្រខ្មែត្រូវបានកែប្រែជាច្រើនជំនាន់ រហូតធ្វើឲ្យមានការប្រើប្រាស់មិនឯកភាពគ្នាពីជំនាន់មួយទៅជំនាន់មួយ ។ ទោះយ៉ាងណាបច្ចុប្បន្ននេះរាជរដ្ឋាភិបាលបានកំណតយកវចនានុក្រមសម្ដេចព្រះសង្ឃរាជ ជួន ណាត ជាគោលទៅហើយ ដូច្នេះគួរតែមានការឯកភាពគ្នាទាំងស្រុង ។
1) ទំនឿមទំលាប់តាមដូនតា
ទំនៀមទំលាប់ពីដួនតាមកក៏មានពាក្យមួយចំនួនអានខុសខ្លះដែរ តែទោះបើកែក៏កែមិនកើត ។ យើងខ្ញុំសូមលើកពាក្យ «វត្តមាន» មកបង្ហាញ ។ ពាក្យនេះ សព្វថ្ងៃអានថា /វ័ត តៈ មាន/ តាមសព្ទរបស់ពាក្យនេះត្រួវអានថា /វ័ត តៈ ម៉ាន/ ។ តែពាក្យនេះធ្លាប់អានខុសដួច្នេះជាយួរមកហើយមិនអាចកែបានទេ ។ សួមស្ដាប់សំឡេងសម្ដេចព្រះសង្ឃរាជ ជួន ណាត ដើម្បីបញ្ជាក់បន្ថែម ។
2) ក្រសួងអប់រំ និងគ្រូបង្រៀន
កន្លងមកដោយសារមានការកែប្រែនៃការសរសេរពាក្យខ្មែរច្រើនទម្រង់ធ្វើឲ្យមានការចងចាំនៃការប្រកបពាក្យទៅតាមជំនាន់រៀងៗខ្លួន ។ ឧៈ ចំឡើយ --> ចំលើយ --> ចម្លើយ(ពាក្យត្រូវ), ចំនាយ --> ចំណាយ (ពាក្យត្រួវ) ជាដើម ។ បើទោះជាសព្វថ្ងៃនេះរាជរដ្ឋាភិបាលនៃព្រះរាជាណាចក្រកម្ពុជាយើងសម្រេចយកវចនានុក្រមសម្ដេចព្រះសង្ឃរាជជាគោលក៏ដោយ ក៏ពួកគាត់នៅមិនទុកចិត្តទាំងស្រុង នៅស្រពិចស្រពិលនៅឡើយ ។
3) វិទ្យុ ទូរទស្សន៍ សារព៏ត៌មាន
ពិធីករទូរទស្សន៍ នៅតែសម្បូរណ៍ដោយពាក្យ «ផងដែរ» ។ ពាក្យនេះទំនងជាប្រែត្រង់ពីអង់គ្លេសមកគឺពាក្យ as well និងពាក្យ also ។ ដល់ថ្នឹកមែនទែនទៅឮតែ «ផងដែរ» ។ យី ! ស្ទើរតែភ្លេចពាក្យ «ជាមួយ» មួយទៀត ក៏ប្រើញាប់នោះញាប់ណាស់ដែរ ។ ឧ ជាមួយពេលនេះផងដែរ ខ្ញុំបាទ/នាងខ្ញុំ... ។ ពាក្យមួយដែលសរសេរបែបនេះ អត្តសញ្ញាណ ពិធីករទាំងឡាយច្រើនអានថា /អ័ត តៈ ស័ញ ញាន/ ។ បើតាមវចនានុក្រមសម្ដេចព្រះសង្ឃរាជ ជួន ណាត លោកដាក់សញ្ញាឲ្យអានថា /អ័ត តៈ ស័ញ ញ៉ាន/ ដូច្នេះទេ ។ យើងខ្ញុំសង្ឃឹមថាបងៗយល់ និងកែសម្រួលទៅរកការពិតផងចុះ ។ ពាក្យ អប់រំ នេះក៏កម្រឮពិធីករឬរៀមច្បងយើងថាត្រូវណាស់ គឺលោកច្រើនអានថា /អោប រំ/ ទៅវិញ ។ វាទៅជាមានន័យថា អោប ផង រំ ផង មិនមានការប្រៀនប្រដៅ បង្រៀនឲ្យចេះដឹងទេ ។
4) ភាពយន្តបញ្ចូលសំឡេងខ្មែរ
ភាពយន្តបញ្ចូលសំឡេងខ្មែរនេះជាប្រភពផ្សព្វផ្សាយវប្បធម៌និងចំណេះដឹងដ៏ធំមួយដែរ ។ យើងខ្ញុំសូមអរគុណរៀមច្បងដែលបានប្រែភាសានិងបញ្ចូលសំឡេងទៅក្នុងភាពយន្តទាំងនោះដើម្បីឲ្យបងប្អូនខ្មែរអាចយល់ន័យនៃផ្ទៃរឿងបាន ។ តែបងៗពេលខ្លះក៏មិនបានប្រែសម្រួលឲ្យបានល្អងាយស្ដាប់យល់ និងឲ្យទៅជាចរិតលក្ខណៈខ្មែរទេ ។ ដួចជាការបញ្ចូលសំឡេងរឿងថៃ ក៏យកស្ទីលតាមថៃ ដោយដាក់ពាក្យ បាទ ៗ នៅខាងចុងប្រយោគ ។ ឧៈ លោកអញ្ជើញមករកអ្នកណាដែរ បាទ ? ក្រុមហ៊ុនខ្លះទៀតក៏និយាយពាក្យខ្មែរ បង្អូសទៅជាខុសតែម្ដង ដូចជា «រង់ចាំ» ទៅជា «រងចាំ» ជាដើម ។ ត្បិតតែបងៗមិនខុសអក្ខរាវិរុទ្ធមែនតែវាក៏ជាការនាំទៅរកការសរសេរខុសដែរ ។
5) សារព័ត៌មានអនឡាញ
អនឡាញជាចំណុចក្ដៅមួយសព្វថ្ងៃនេះ ។ ដោយសារបច្ចេកវិទ្យាបានធ្វើឲ្យការផ្សព្វផ្សាយព័ត៌មានលឿនទាន់ហេតុការណ៍ តែទន្ទឹមនឹងនោះដែរក៏មានការផ្សព្វផ្សាយព័ត៌មានផ្ដេសផ្ដាស ដោយគ្រាន់តែចង់ទាញអ្នកទស្សនាឲ្យចូលមើលវ៉ិបសាយខ្លួនប៉ុណ្ណោះ រួមទាំងអក្ខរាវិរុទ្ធខ្មែរមិនប្រិតប្រៀង ដូចជាការសរសេរ ឲ្យ --> អោយ ជាដើម ។ នៅលើផេកហ្វេសប៊ុកដ៏ល្បីមួយ (យើងខ្ញុំសុំមិនបញ្ចេញឈ្មោះ) មានការសរសេរពាក្យ «ឲ្យ» ទៅជា «អោយ» វិញ បើទោះជាធ្លាប់មានការរិះគន់កែលម្អពីសំណាក់អ្នកគាំទ្រជាច្រើនលើកច្រើនសាក៏ដោយ ។ ផេកនោះជាផេកធំមួយនឹងមានអ្នកគាំទ្រច្រើនណាស់ បើសរសេរខុសអក្ខរាវិរុទ្ធដូច្នេះនឹងធ្វើឲ្យខ្មែរផ្សេងទៀតយល់ច្រឡំនិងសរសេរតាមដោយយល់ថាត្រូវ ។
6) អ្នករៀនអង់គ្លេសបានជ្រៅជ្រះ
អាចនិយាយបានថា មកពីការឆ្លងវប្បធម៌បរទេស ដែលធ្វើនិស្សិតខ្មែរមួយចំនួនតូចដែលចេះអង់គ្លេសជ្រៅជ្រះនោះមិនខ្វល់ខ្វាយពីអក្ខរាវិរុទ្ធខ្មែរទេ ក្នុងនោះក៏មានអ្នកបម្រើការក្នុងអង្គការដែរ ។ បើទោះជារាជរដ្ឋាភិបាលនៃព្រះរាជាណាចក្រកម្ពុជាបានប្រកាសយកវចនានុក្រមសម្ដេចព្រះសង្ឃរាជជួន ណាតធ្វើជាគោលនៃការសរសេរអក្ខរាវិរុទ្ធក៏ដោយក៏ពួកគេមិនខ្វល់ដែរ ។ គេអាងខ្លួនគេជាអ្នកចេះដឹងម្នាក់ ហើយជាអ្នកធ្វើការជាមួយបរទេស គេប្រើច្រើនជាភាសាបរទេសដូច្នេះពេលគេធ្វើឯកសារម្ដងៗគេពិនិត្យបានល្អិតល្អន់ណាស់ គេប្រើកម្មវិធីវចនានុក្រមផង សៀវភៅវចនានុក្រមផង ព្រោះខ្លាចក្រែងសរសេរភាសាជាតិគេខុស តែពេលគេសរសេរភាសាជាតិខ្មែរវិញគេមិនខ្ចីយកភ្នែកមើល ឬផ្ទៀងផ្ទាត់វចនានុក្រមខ្មែរទេ ទោះបី មានជាកម្មវិធីប្រើហើយក៏ដោយ ។ ទង្វើនេះហាក់មិនឲ្យតម្លៃជាតិខ្មែរ ទាំងដែលខ្លួនជាខ្មែរ ។
7) ខារ៉ាអូខេ
ខារ៉ាអូខេ ក៏ជាប្រភពផ្សព្វផ្សាយមួយទៀត ។ ប្រភពនេះក៏មិនមានការត្រួតពិនិត្យត្រឹមត្រូវ ទាំងអក្ខរាវិរុទ្ធនិងចំណងជើងបទចម្រៀង ជាដើម ។ ឧៈ បទ ផ្ញើប្រាណលើផ្កាឈូកស --> ភព្វសំណាង, ព្រែកឯងអស់សង្ឃឹម --> ព្រែកឯងដាច់អាល័យ ។ ចំណែកអក្ខរាវិរុទ្ធវិញក៏សរសេរ ព្យាង្គរាយទៅជាព្យាង្គត្រួត ព្យាង្គត្រួតមកជាព្យាង្គរាយវិញក៏មាន ព្រោះគេមិនច្បាស់វេយ្យាករណ៍ ហើយមិនព្រមមើលវចនានុក្រម ព្រមទាំងមិនសួរអ្នកចេះណាទាំងអស់ ។
យើងខ្ញុំសូមអភ័យទោសចំពោះការសរសេរខុសឆ្គង លើសលោះត្រង់ណា ព្រោះយើងខ្ញុំក៏មានចំណេះតិចតួចស្ដួចស្ដើង ដោយចិត្តស្រឡាញ់ក៏ដាច់ចិត្តលើកចំណុចទាំងនេះមកពិភាក្សាពិគ្រោះយោបល់គ្នាដើម្បីការរីកចម្រើនប៉ុណ្ណោះ ។ សូមបញ្ចេញយោបល់បងប្អូនក្នុង comment ។
